بقلم: الغفيل سكينة شاعرة البادية
معدن الانسان
نعطر لمكان قبل ما نذكر الرحمان
بالزهر وعود الخزران
ونصلي على النبي العدنان
وماتكونش زربان
معدن الانسان مع الوقت يبان
شحال من صحاب
درناهم حباب وخوت
وفرقتنا معاهم الشدة قبل الموت
وراه كلشي يفوت
وبنادم كيدير لافوت
ملي يفرط فالعائلة والخوت
وينسى مالك الملك
والملكوت وبلي تابعاه الموت
ملي لبو والميمة تديهم الموت تتفرق لخوت
والباب يدار ليه قفل
ما عندو ساروت
متحكم متقول
هذا صاحب
هذا حبيب
الشدة توريك
العدو من الصديق
ومزال الزمان يوريك
كين لي في نص الطريق
يخليك
وكين لي في خفا معاديك
حتى تحيه الفرصة
ويعطيك
ومزال الزمان يقريك
شحال من دقة
فالظهر جات
حياتنا ماوقفتش عاد بدات
ولي قالك رد بالك من الغريب يغدرك
قول لو بصح
ولكن غدر لحباب
يقصح
شحال من واحد تلقاه من ضحكتك قالق وزعفان
وكيف أنت طيح يفرح
والضحكة على وجهو تبان
ومكانتش على الحسبان
وسدو فوجوهنا شحال من بيبان
ولكن كلشي بيد الرحمان
حاشا حاشا واش نخيب
وأنا فمي فيه الصلاة على النبي الحبيب
بنادم حجر وطوب
وحنا حامدين الله نصرفو المكتوب
والا تغدرنا وسدو فوجوهنا البيبان
يفرجها يفرجها
الرحمان
واش من زمان
لي يفرح
ولا القريب ماشي الغريب لي يقصح
شوف الميمة لي حضنت وجمعات
كبرت وربات
حصدت ودرسات
مريضة ولا صحيحة
مع الهلال سرات
ولي عليها الروس تحطات
خسارة فدار العجزة ترمات
حتى واحد ملقاها كيف بغاها
يالي هاز هم الدنيا فقلبو ويدور
صلي على النبي المبرور
وشوف المقبرة والقبور
وشحال من واحد بنا وخلا
وشحال من واحد
بمالو تعنا
وشحال من واحد على مال ليتاما تكا
وداها على كتافو تقلا
وشحال من واحد يخسر فالفلوس ويحسب فالعوام
وباغي ولدو يقرا وبيه يفرح
وهو دارع فالطرقان
يشطح
وشحال من بنت على راسها خرجات
بالدوران والمخدرات
وفرحت ولديها مكملات
نطبو الله يسمح لينا حنا ما تشفيها
بغينا الرسالة توصل ولي كيسمعني ينقد راسو قبل ما يحصل
بلاما تهز الهموم
حتى حاجة ماتدوم من غير الله الحي القيوم
شوف سيد الخلق عليه واش تقال
وما تنفق الريال من غير الا كان حلال
وما يهمك واش محبوب
وطلب الله يستر لعيوب
ويسل الشوكة بلا ذنوب
والا حبك مولاك
الخير يتسناك
عا قصد مولاك
واعزم فالصلاة والأدعية
بالإخلاص والنية
وكون من الأذكية
وصلي على خاتم الأنبية
محمد زين السمية
